Оғози чорабиниҳои Наврузӣ дар Хуҷанд

Хуҷанд,19.03.2015. (АМИТ “Ховар”, Абдуаҳад Шарифзода).-Дар маҳаллаҳои шаҳри Хуҷанд шурӯъ аз 15 март чорабиниҳои наврӯзӣ оғоз гардиданд. 
      Тавре ки ба АМИТ “Ховар” роҳбари хадамоти матбуотии раиси шаҳр Маҳмудҷон Муҳаммадӣ иттилоъ дод, тибқи дастури раиси шаҳри Хуҷанд Раҷаббой Аҳмадзода ва нақшаи чорабиниҳои мақомоти маҳаллӣ баргузории чорабиниҳои таҷлили Наврӯз дар 22 маҳаллаи шаҳр дар назар гирифта шуда, он оғоз аз 15 март то охири моҳи равон идома меёбад. 
      Ба гуфти манбаъ, то кунун дар се маҳаллаи шаҳр- “1 май”, “Чорчароғ” ва  “Масчиди савр” тантанаҳои наврӯзӣ бо иштироки шаҳрдори Хуҷанд Раҷаббой Аҳмадзода доир гардиданд.  
    Бояд гуфт, ки сокинону бошандагони маҳалла барои таҷлили Наврӯз омодагии ҳамаҷониба дидаанд. 
      Он рӯз аз ҷониби иштирокдорон ва толибилмони макотибҳои ин маҳал ба меҳмонон барномаи наврӯзӣ иборат аз шеъру дубайтихонӣ дар васфи баҳору Наврӯз, мадҳияи “бойчечакхонӣ”, бозию ҳунарҳои миллӣ,  аз қабили “Кокулбофӣ”, “Ҳаппакбозӣ”, “Ошиқбозӣ”, “Лаппар”, “Лалакпарронӣ”, “Даврабозӣ”, суруди “Нақшхонӣ” ва оростани дастархони наврӯзӣ бо “Ҳафт син”-у  “Ҳафт-шин” ва  таъоми анъанавии “Суманак” намоиш дода шуданд.
     Шаҳрдори  Хуҷанд ба ҳар як иштирокчӣ барои барномаи ҷолиб баҳои баланд дода, онҳоро бо иди пуршукӯҳи баҳор- Наврӯзи Аҷам табрик намуд. 
      Хотиррасон бояд кард, ки чорабиниҳои наврӯзӣ дар дигар маҳаллаҳои шаҳр низ идома ёфта, чорабиниҳои асосии Наврӯзи ҷумҳуриявӣ, ки соли равон дар Хуҷанд мегузарад, 21 март дар боғи навбуёди таърихиву фарҳангии ба номи Камоли Хуҷандӣ бо иштироки Сарвари давлат Эмомалӣ Раҳмон доир хоҳад шуд.