«Оилаи солим — миллати солим»: Рўзи дарҳои кушод

Душанбе, 13.03.2015.(АМИТ  «Ховар», Лайло Тоирӣ).- Дар доираи чорабиниҳо бахшида ба эълон гардидани Соли оила аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таҳти шиори «Оилаи солим — миллати солим»- 14 марти соли 2015 аз соати 8.00 то 12.00 дар муассисаҳои тиббии вилоятҳо ва шаҳру ноҳияҳои ҷумҳурӣ  аз ҷониби мутахассисони соҳибтаҷрибаи соҳаи тиб машварати тахассусии ройгон гузаронида мешавад. 
Чорабинии мазкур дар шаҳри Душанбе, дар саҳни Пажўҳишгоҳи гастроэнтерология — кўчаи Маяковский 2 (рў ба рўи Сафорати Олмон дар Тоҷикистон) ва марказҳои саломатии шаҳрӣ баргузор гардида, дар он мутахассисони соҳибтаҷрибаи соҳаи тиб, аз ҷумла профессорон ва мутахассисони варзида ширкат намуда, машварати тахассусии ройгонро ба аҳолӣ пешкаш мегардонанд.
Бино ба иттилои хадамоти матбуоти Вазорати тандурустӣ ва ҳифзи иҷтимоии аҳолӣ, дар доираи ин чорабинӣ сокинони кишвар имкон доранд дар муассисаҳои тиббӣ аз ташхиси набзу фишор, сабти барқии кори дил, муайян намудани миқдори қанд дар хун, муоинаи чашм, ташхиси флюрографӣ ба таври ройгон  истифода намоянд.