Сироҷиддин Аслов бо Лакшми Пури мулоқот кард

Душанбе, 27.03.2015 (АМИТ «Ховар»).- 26 марти соли 2015 дар қароргоҳи СММ мулоқоти вазири корҳои хориҷии Ҷумҳурии Тоҷикистон Сироҷидин Аслов бо муовини сохтори “СММ-Занон” Лакшми Пури баргузор гардид.
Зимни мулоқот масъалаҳои ҳамкорӣ миёни Ҷумҳурии Тоҷикистон ва сохтори “СММ-Занон”, раванди татбиқи лоиҳаҳои ниҳоди мазкури СММ дар Тоҷикистон, ба вижа лоиҳаҳои марбут ба беҳсозии амнияти иқтисодии занон, таъмини баробарии гендерӣ, пешгирии хушунат алайҳи занон, инчунин дигар мавзуъҳои умдаи ҳамкорӣ мавриди муҳокима қарор доданд.
Ҷонибҳо инчунин зимни суҳбат масъалаҳои тадорукоти Конфронси байналмилалии сатҳи баланд роҷеъ ба татбиқи Даҳсолаи байналмилалии амал “Об барои ҳаёт”, 2005-2015-ро, ки 9-11 июни соли ҷорӣ дар Душанбе баргузор мегардад, муҳокима намуданд. Вазири корҳои хориҷӣ аз ниҳоди мазкури СММ ҷиҳати ширкати фаъолона дар конфронси номбурда, инчунин дар Анҷумани “Об ва Занон”, ки 8 июни соли ҷорӣ дар чаҳорчӯби Конфронс барпо мегардад, даъват ба амал овард.