Таҷлили иди хабарнигорон дар Айнӣ
Душанбе, 12.03.2015. (АМИТ «Ховар», Мавҷуда Анварӣ).- Дирӯз дар мақомоти иҷроияи ҳокимияти давлатии ноҳияи Айнӣ бахшида ба Рӯзи матбуоти тоҷик чорабинии идона доир гардид.
Тавре ки сармуҳаррири рӯзномаи ноҳиявии «Меҳнат» Муҳаммадносир Насруллоев иттилоъ дод, дар чорабинии идона аҳли фарҳангу маориф ва кормандони васоити ахбори омма иштирок намуданд.
Бибисаид Муҳиддинова- муовини раиси ноҳияи Айнӣ хабарнигоронро ба муносибати иди касбиашон табрик гуфта, ба корҳои эҷодиашон комёбиҳо таманно намуд. Сипас дар фазои тантанавӣ ба 11 нафар корманди ВАО туҳфаҳои хотиравии мақомоти иҷроияи маҳаллӣ тақдим шуд.