Таҷлили Рӯзи байналмилалии Наврӯз дар минтақаҳои РФ
Душанбе, 30.03.2015. (АМИТ «Ховар», Лайло Тоирӣ ).- Тавре ки котиби матбуоти Намояндагии Вазорати меҳнат, муҳоҷират ва шуғли аҳолии Тоҷикистон дар ФР Иброҳим Аҳмадов ба АМИТ «Ховар» хабар дод, бо ибтикори созмони ҷамъиятии «Иттифоқи тоҷикистониён» — и кишвари Хабаровск ва раиси иттифоқи мазкур Рустам Азамов дар шаҳри Хабаровск ба ифтихори иди байналмилалии Наврӯз иқдоми идона роҳандозӣ шуд.
Дар ҳошияи ин чорабинӣ намоишгоҳи санъати амалӣ доир гардида, либосу таомҳои миллии мардуми тоҷик ба маърази намоиш гузошта шуданд.
Ташаббускорони ид байни дастаҳои ҷамоаҳои миллии муқими кишвари Хабаровск мусобиқот аз рӯи минифутбол ва волейбол ташкил намуда, ғолибони он бо ифтихорномаю инъомҳои қиматбаҳо қадр шуданд.
Ба гуфтаи Иброҳим Аҳмадов, дар қисми тантанавии чорабинӣ намояндагони Ҳукумати кишвари Хабаровск, Анҷумани мардуми кишвар ва роҳбарони созмонҳои ҷамъиятии Ӯзбекистон, Қирғизистон, Ингушистон, Украина ва Озарбойҷони минтақа иштирок намуданд. Дар маросим барқияи табрикотии Вазорати меҳнат, муҳоҷират ва шуғли аҳолии Ҷумҳурии Тоҷикистон қироат шуд.
Дар мусобиқот 12 дастаи варзишии иттиҳодияҳои миллию фарҳангии шаҳри Санкт — Петербург, ҳамчунин дастаҳои донишҷӯёни Донишгоҳи давлатии роҳҳои оҳан ва мактаби комплексии маҳорати олии варзишии он иштирок намуданд.