Ҳафтаи технология дар Душанбе

Душанбе, 14.04.2015.(АМИТ «Ховар», Руқияи Боймамад).- Бо дастгирии Мақомоти  иҷроияи маҳаллии ҳокимияти давлатӣ дар шаҳри Душанбе тибқи Қарори раиси шаҳри Душанбе аз 8 апрели соли 2015 аз 13 то 18 апрели соли  ҷорӣ ҳафтаи технология ва ихтироъкории наврасону ҷавонони шаҳри Душанбе эълон гардид.
Чорабинии мазкур бо ҳадафи баланд бардоштани сатҳи фарҳанги техникӣ, тарғиби маданияти истифодаи иттилоотии интернетӣ, ҷорӣ намудани техникаю технологияи инноватсионии муосир дар раванди таълим, сайқал додани донишу маҳорат ва дастгирии ихтироъкориву навоварии наврасону ҷавонон дар ин самт баргузор мегардад.
Дар чорабинии мазкур олимону мутахассисони соҳаи ТИК, коршиносон ва намояндагони ВАО ширкат хоҳанд кард. Дар ҷамъбасти чорабиниҳо маҷмӯи  корҳои анҷомдода ва мақолаву гузоришҳо нашр  мешавад.
Форуми наврасону ҷавонони шаҳри Душанбе оид ба технологияҳои иттилоотиву коммуникатсионӣ, ки 15 апрел баргузор  мешавад, аз рӯи 5 номгуи байни довталабон озмун эълон кардааст. «Лоиҳаҳои инноватсионӣ барои ҳалли масъалаҳои шаҳрдорӣ», «Лоиҳаҳои иноватсионӣ дао соҳаи маориф», « Барномаҳои таълиму омӯзишии интерактивӣ»,  «Лоиҳаи инноватсионӣ дар соҳаи хизматрасонӣ ва аҳолӣ»,  « Лоиҳаи инноватсионии автоматикунонии хизматрасониҳои мақомоти давлатӣ ва бахши хусусӣ».
Ғолибони озмун бо ифтихорномаҳо ва туҳфаҳо қадрдонӣ мешаванд.