Ҳамкории милиса бо аҳли ҷамъият

Душанбе, 29.04.2015. (АМИТ «Ховар», Муқаддас  Темурзода ).- Вазорати  корҳои дохилии  Тоҷикистон  зимни  ҳамкорӣ  бо  дафтари САҲА  дар  Тоҷикистон  ва  дастгирии  сафорати  ИМА  дар  ҶТ   аз  27  то  29  апрел  мизи  мудаввар  дар  мавзӯи  «Ҳамкории  милиса ва  аҳли  ҷамъият :  кор бо  Шӯроҳои  ҷамъиятӣ ва  ВАО»  доир  менамояд.
Назар  ба  иттилои  ВКД ҶТ,  дар  кори  мизи  мудаввар  кормандони  милиса,  масъулини  ташкили  хамкорӣ  бо  аҳли  ҷамъият,  аъзои Шӯроҳои  ҷамъиятии  мусоидати ҷомеаи  шаҳрвандӣ  ба  ислоҳоти  милисаи  назди  ВКД ҶТ,   намояндагони  раёсатҳои  ВКД воқеъ  дар  ҳамаи  вилоятҳои ҷумҳурӣ,   ҳамчунин  коршиносони  байналмилалии Ирландияи  Шимолӣ,  Русия  ва  Қирғизистон  иштирок  доранд.
Дар  мизи  мудаввар  коршиносони  ҷаҳон  дар  бораи  лоиҳаи  «Ибтикороти  амнияти  ҷамъиятӣ» — и САҲА  дар  Қирғизистон, ки  охири  моҳи  январи соли  2011  дар  ҳудуди   вилояти  Ӯш  рӯи  кор  оварда шуда буд,  нақл  карда,  иштирокдорони  мизи  мудавварро бо  усули   навтарини  ҷалби  шаҳрвандон  дар  амри  таъмини  амнияти  ҷамъиятӣ  шинос  намуданд.
Дар  ҷараёни  ин  чорабинӣ  самтҳои  асосии  ислоҳоти  милисаи  Тоҷикистон, ки  манзураш  рӯи кор овардани  муносибатҳои  ҳамкорӣ  бо ҷомеаи  шаҳрвандӣ, эҳёи  боварии аҳли  ҷамъият ва аҳолӣ  ба милиса мебошад,  мавриди  муҳокима  қарор  гирифтанд.