Ҳунарнамоии «Базморо» дар Кувайт

Душанбе, 6.04.2015.(АМИТ «Ховар», Марзия Саидзода).- Дар Кувайт Рӯзҳои фарҳанги Тоҷикистон оғоз гардиданд. Ин чорабинии муҳими фарҳангӣ дар иртибот ба ифтихори 20 -умин солгарди барқароршавии муносибатҳои дипломатӣ байни Ҷумҳурии Тоҷикистон ва Давлати Кувайт бо ибтикори Сафорати Тоҷикистон дар ин кишвари арабӣ созмон дода шудааст. 
  Дар маросими ифтитоҳи Рӯзҳои фарҳанги Тоҷикистон дар Кувайт намояндагони баландмақоми ҳукумат ва Вазорати корҳои хориҷии Давлати Кувайт, намояндагони ҳайати дипломатии муқими Кувайт, шахсиятҳои шинохта ва аҳли илму адаби Кувайт ширкат намуданд.
Бояд тазаккур дод, ки ҷиҳати иштирок дар ин чорабинии фарҳангӣ аз Тоҷикистон овозхони ансамбли «Дарё»-и Кумитаи телевизион ва радиои назди Ҳукумати ҷумҳурӣ Нигина Амонқулова ва ҳунармандони ансамбли рақсии «Базморо» ба Давлати Кувайт сафар намуда,  бо барномаҳои ҷолиби мусиқӣ санъати волои тоҷиконро дар ин кишвари арабӣ муаррифӣ намуданд. 
      Ҳамзамон дар доираи баргузории Рӯзҳои  фарҳанги Тоҷикистон дар Кувайт ҳунарҳои миллии тоҷикон, таомҳои миллӣ, маҳсули дастони рассомон ва аксбардорони тоҷик ба намоиш гузошта шуданд, инчунин гӯшаи китоб ва адабиёти мухталиф, ки муаррифгари таъриху фарҳанги пурғановати тоҷикон ва зебоиҳои нотакрори диёри ҳамешабаҳорамон — Тоҷикистон  аст, созмон дода шуд.