Ҷаласаи Комиссияи давлатии кишвар оид ба ҳолатҳои фавқулодда

Душанбе, 13.04.2015 (АМИТ «Ховар», Фарзонаи Давлат).- Имрўз дар ҳузури Сарвазири мамлакат Қоҳир Расулзода ҷаласаи Комиссияи давлатии Ҳукумати Ҷумҳурии Тоҷикистон оид ба ҳолатҳои фавқулодда баргузор шуд.Тавре таъкид карда шуд, соли 2014 дар мамлакат 67 ҳолати ҳодисаҳои табиӣ ба қайд гирифта шудааст, ки бар асари он 31 шаҳрванд ба ҳалокат расида ҳаҷми зарари расида зиёда аз 41 миллион сомониро ташкил медиҳад. Дар ҷаласа зарурати беҳбуд бахшидани кори комиссияи мазкур дар маҳаллҳо таъкид гардида, аз кори масъулони ситодҳои фавқулодда ва мудофиаи гражданӣ, раисони шаҳру ноҳияҳои мамлакат изҳори норозигӣ карда шуд.Аъзои комиссия вазифадор карда шуданд, ки ҷиҳати пешгирӣ ва бартарафсозии ҳолатҳои фавқулодда аз ҷумла тармафароӣ, сел ва лағжиши ярч тадбирҳои зарурӣ андешида барои ворид намудани тағйиру иловаҳо ба нақшаи кории Комиссияи давлатии Ҳукумати Ҷумҳурии Тоҷикистон оид ба ҳолатҳои фавқулодда таклифҳои асоснок пешниҳод намоянд.