Ҷамъомади хотирмон ба ифтихори гусели наваскарон

Тоҷикобод,28.04.2015.(АМИТ «Ховар», М. Ризвон.).-Имсол даъвати баҳории ҷавонон ба хизмати ҳақиқии ҳарбӣ дар ноҳияи Тоҷикобод пеш аз муҳлат иҷро шуд. Аз шумораи умумии ҷавононе, ки барои хизмати ватан  ба қисмҳои ҳарбии кишвар фиристода шуданд, сӣ нафар ихтиёрӣ буд. Ба ин муносибат дар назди бинои комиссариати ҳарбии ноҳия таҳти шиори «Рӯзи даъватшаванда» ба ифтихори гусели 30 нафар ихтиёрӣ ҷамъомади хотирмон баргузор гардид. 
Муовини раиси ноҳия, раиси ситоди ноҳиявии даъвати ҷавонон ба сафи Қувваҳои Мусаллаҳ Аброр Ғафуров зикр кард, ки аз мавсим то мавсим сафи ҷавонони бо нангу ори ватандӯст, ки хизмати ҳарбиро ихтиёран интихоб менамоянд, меафзояд. Дар даъвати баҳорӣ имсол бори аввал аст, ки мо теъдоди зиёди ихтиёриёнро ба сафи Қувваҳои Мусаллаҳ гусел менамоем. Дар маъракаи гусели ихтиёриён раиси ноҳия Ҳусейн Ализода аз рафтори ҷавонони ноҳия изҳори қаноатмандӣ кард.