Ҷустуҷӯи роҳҳои хушбахтӣ дар оила

Душанбе, 29.04.2015.(АМИТ Ховар, Рафоати Абдулҳамид).- Тавре ки Хадамоти матбуоти раиси вилояти Суғд хабар додааст, дар толори Раёсати Донишгоҳи давлатии Хуҷанд ба номи академик Бобоҷон Ғафуров машғулияти навбатии маҳфили тарғиботчиёни ҷавон «Андеша» таҳти унвони «Хонавода ва мушкилоти оиладорӣ» баргузор гардид.Дар чорабинӣ муовини ректор оид ба корҳои тарбияи раёсати донишгоҳ Мӯъминҷон Шамсиддинов ва 50 нафар олими ҷавон, аспирантону магистрантон ва донишҷӯёни фаъол иштирок намуда, дар атрофи мавзӯи мазкур ва муаммоҳои оиладорӣ сухан гуфтанд.Иштирокчиёни маҳфил бештар дар атрофи ҷустуҷӯи роҳҳои хушбахтӣ дар оила, пайдо намудани муносибати созгор бо хусуру хушдоман ва шавҳар, омилҳои пешгирӣ аз бекоршавии никоҳ, оқибатҳои нохуши никоҳҳои барвақтӣ ва хешутаборӣ, таъсири муҳоҷирати меҳнатӣ, ҳамдигарнофаҳмӣ, сабру таҳаммул ва дигар омилҳое, ки боиси парокандашавии оилаҳо мегарданд, изҳори ақида намуда, ба саволҳои худ посух гирифтанд.