370 манзили зист зери об монд

 
Душанбе,21.04.2015. (АМИТ «Ховар».-Иброҳими Ҳабибуллоҳ).-Тӯли  чанд рӯз аст, ки дар шаҳри Шанхайи Ҷумҳурии Мардумии Чин бориши  борони пай дар пай ва сардии ҳаво ҳукмфармост. Бар асари боронрезиҳои ҳамвора сатҳи оби рӯду наҳрҳо боло рафта, ба минтақаҳои аҳолинишин маҷро гирифт. Дар пайи ин офати табиӣ 24 нафар  бедарак гардида, садҳо нафари дигар хисороти зиёд диданд. Гуфта мешавад, ки сатҳи об дар баъзе минтақаҳо қариб ба 2 метр мерасад. Тибқи иттилои сарчашма 370 манзили зисти сокинон ва дигар иншооти маъмурӣ пурра зери об монд. 
 
 Душанбе,21.04.2015. (АМИТ «Ховар»).-Ҷангиёни гурӯҳи ифротгарои «Давлати исломӣ» 95 километр дуртар аз шаҳри Киркук дар нуқтаи маъмурии аҳолинишини Заб 24 шаҳрванди Ироқро ба қатл расониданд. Гуфта мешавад, ки вақтҳои охир саркардаҳои ин гурӯҳи ифротгаро аз ҷараёни қатлу куштори асирон наворҳои мудҳиш интишор медиҳанд, то дар дили мардум тарсу ҳаросро ҷо кунанд. 
 
Душанбе,21.04.2015. (АМИТ «Ховар»).-Дирӯз дар яке аз биноҳои истиқоматии сеошёнаи пойтахти Канада-шаҳри Оттава сӯхтори шадид ба амал омад. Мувофиқи маълумоти расида, оташсӯзӣ дар як муддати кӯтоҳ 40 хонаи зисти сокинонро ба коми худ фурӯ кашид. Ҳукуматдорон дар айни ҳол ба зарардидагон  дар бинои коллеҷи Алгонкин, ки дар наздикии макони ҳодиса воқеъ мебошад, сарпаноҳи муваққатӣ муҳайё намуданд. Мутахассисони соҳаи мазкур баъди бартараф намудани сӯхтор сабабҳои сар задани ҳодиса ва ҳаҷми хисороти расидаро  муайян мекунанд.
 
     Душанбе,21.04.2015. (АМИТ «Ховар»).- Мувофиқи иттилои Бозрасии давлатии автомобилӣ Русия  дар яке аз роҳҳои мошингарди пойтахти Федератсияи Русия-  шаҳри Маскав садамаи нақлиётӣ ба вуқӯъ омада, дар ҷои ҳодиса   2 нафар ба ҳалокат расида, 2 каси дигар бо ҷароҳатҳои гуногуни ҷисмонӣ бистарии беморхона гардиданд. Гуфта мешавад, ки ҳодисаи мазкур  дар минтақаҳои ҷанубу шарқии кищвар ба амал омад. Бо мақсади муайян намудани сабабҳои дақиқи садама кормандони ниҳоди дахлдор тафтиш мебаранд.