Афзоиши ҷиноятҳо вобаста ба маводи нашъаовар дар Хатлон

Душанбе,18.04.2015. (АМИТ «Ховар», Мавҷуда Анварӣ).-Дар семоҳаи якуми соли 2015 дар ҷумҳурӣ 307 ҷинояти вобаста ба маводи нашъаовар ба қайд гирифта шуд, ки ин назар ба ҳамин давраи соли 2014-ум 11% кам мебошад. Ҳиссаи ҷиноятҳои вобаста ба маводи нашъаовар дар миқдори умумии ҷиноятҳо аз 6,1% дар семоҳаи соли 2014 то 4,7% дар семоҳаи якуми соли 2015 ихтисор гардид.
Дар семоҳаи якуми соли 2015 дар қиёс бо ҳамин давраи соли 2014 дар ҳамаи минтақаҳои Тоҷикистон, ба истиснои вилояти Хатлон ба поён рафтани миқдори ҷиноятҳои ба қайд гирифта шуда мушоҳида мегардад. Ҷиноятҳои ба қайд гирифта шудаи вобаста ба маводи нашъаовар дар вилояти Хатлон 16,3% афзоиш ёфт.
Дар семоҳаи якуми соли 2015 барои содир намудани ҷиноятҳои вобаста ба маводи нашъаовар 230 шахс дастгир гардид, ки ин назар ба ҳамин давраи соли 2014 ба 10 шахс камтар мебошад. Соли ҷорӣ барои содир намудани ҷиноятҳои вобаста ба маводи нашъаовар 5 зан дастгир шуд. 
Дар байни минтақаҳои ҷумҳурӣ миқдори шахсони дастгир шуда дар вилояти Хатлон ва НТМ зиёд гашта, дар Душанбе, Вилояти Суғд ва ВМКБ коҳиш ёфтанд.
Дар семоҳаи якуми соли 2015 аз тарафи мақомоти ҳифзи ҳуқуқ ва сохторҳои қудрати Ҷумҳурии Тоҷикистон аз муомилоти ғайриқонунӣ 1 т 263 кг маводи нашъаовар мусодира гардид, ки нисбат ба ҳамин давраи соли 2014-ум  0,2% зиёд мебошад.
Дар ин бора ба АМИТ «Ховар» аз Агентии назорати маводи нашъаовар хабар доданд.