Баргузории нахустин анҷумани соҳибкорони Тоҷикистону Фаронса

Душанбе, 24.04.2015. (АМИТ «Ховар», Муқаддас Темурзода).- Имрӯз дар Душанбе бо даъвати Кумитаи давлатии сармоягузорӣ ва идораи амволи давлатии ҶТ, нахустин анҷумани соҳибкорони Тоҷикистону Фаронса баргузор гардид. Дар чорабинии мазкур намояндагони вазорату идораҳои  Тоҷикистон, зиёда аз 20 нафар соҳибкор ва  15 нафар намояндаи ширкатҳои Фаронса дар ҶТ, инчунин беш аз 60 нафар соҳибкори ватанӣ ширкат варзид.
 Дар ин анҷуман ҳарду ҷонибро намояндагони давраҳои соҳибкорони  бахшҳои мухталифи иқтисодӣ, аз қабили энергетика, саноат, истихроҷи нафту газ, туризм, нақлиёту алоқа ва фаъолияти бонкӣ муаррифӣ намуданд.
  Нахуст раиси Кумитаи давлатии сармоягузорӣ ва идораи амволи давлатии ҶТ Қодири Қосим ифтитоҳ бахшид.  Сипас аз ҷониби намояндаи ширкати МЕДЕФ Интернейшнл, имкониятҳои сармоягузории Фаронса муаррифӣ гардид.
  Бояд зикр намуд, ки мақсади баргузории анҷуман- ин боз ҳам мустаҳкам намудани ҳамкориҳои судманди тиҷоратии байни ду  кишвар, ҷалби сармоя ва дарёфти шарикони нав муҳокимаи масъалаҳои мавҷуда барои тақвият дар соҳаҳои афзалиятнок мебошад.
 Дар ҷараёни чорабинӣ ҳамчунин намояндагони вазорату идораҳои марбутаи ҳарду кишвар вобаста ба иқтисодиёту саноат, сармоягузорӣ ва тиҷорат маърӯза намуданд.  
Дар фарҷом байни соҳибкорони Тоҷикистону Фаронса вохӯрии дуҷониба баргузор гардид, ки зимни он масъалаҳои гуногуни имкониятҳои иқтисодии ҳарду кишвар муҳокима шуданд.