Боз ду тоҷик қурбони гирифтани патент шуданд

Душанбе, 24.04.2015. (АМИТ  «Ховар», Лайло Тоирӣ).-Хадамоти муҳоҷҷирати Вазорати меҳнат, муҳоҷират ва шуғли аҳоли Ҷумҳурии Тоҷикистон расман иттилоъ медиҳад, ки санаи 20 апрели 2015 тақрибан соати 23:30 дақиқаи шаб, дар шоҳроҳи 19 км МКАД-шаҳри Маскав садамаи нақлиётӣ бо бархўрдани чандин автомашинаи хурд ва ду мошини калони боркаш ба вуқуъ пайваст ва боиси ҳалокати одамон гардид.
Тибқи баъзе маълумотҳои васоити ахбори омма гўё 4- нафар шаҳрванди тоҷик дар ин фоҷиа ба ҳалокат расидааст.
Намояндагии Хадамоти муҳоҷират баъди санҷида баромадани ин воқеаи нохуш муайян намуд, ки фақат ду шаҳрванди Тоҷикистон-яке Додов Самад Абдуллоевич, с.т. 1981, зодаи ноҳияи Ванҷ ва Шоев Ҷумъахон Усмонович, с.т. 1970, зодаи ноҳияи Файзобод ба ҳалокат расидаанд.
Бояд қайд намуд, ки шаҳрвандони марҳум бо мақсади ба расмият даровардани патент дар Маркази бисёрсоҳаи муҳоҷират, пос Сахаврово, шабона барои гирифтани навбат раҳиспор буданд. Ду нафар шаҳрванди дигар аз ҷониби намояндагӣ муайян гардид, ки яке Отаев Акрамҷон шаҳрванди Кирғизистон ва дигаре Юсупов Нуриддин Сумиевич шаҳрванди Ӯзбекистон мебошанд. 
Бино ба иттилои сухангӯи Хадамот А.Кодирӣ, бо мусоидати намояндагӣ ҷасади шаҳрвандон шаби 21 апрел тавассути ширкати ҳавопаймои «Тоҷик — Эйр» ба ватан оварда шуданд.