Боздиди Аситх Бхаттачардҷи аз Конибодом

Душанбе,01.04.2015 (АМИТ “Ховар”, Рафоати Абдулҳамид).- Чанде қабл бо мақсади шиносоӣ бо фаъолияти хоҷагии халқи шаҳр, фарҳангу маданият ва кору пешрафти сокинон сафири давлати Ҳиндустон дар Тоҷикистон Аситх Бхаттачардҷи ба шаҳри Конибодом ташриф овард.
Ба иттилои дафтари матбуоти раиси вилояти Суғд сафири Ҳиндустон рӯзи аввали ташрифи хеш дар чорабинии наврӯзии донишҷӯёни Коллеҷи омӯзгории шаҳр иштирок карда, аз анъанаҳои наврӯзии ба намоишгузошташуда ва маҳсули ҳунарҳои дастии донишҷӯёни коллеҷ дидан намуд.
Рӯзи дуюми ҳузури хеш сафир аз вазъи фарҳангу тамаддуни шаҳр ошноӣ пайдо намуда, аз осорхонаи таърихӣ-кишваршиносии Мирраҷаб Додхоҳ, манораи Норчабой, кинотеатри ба номи К.Ёрматов ва ба коргоҳи таъмири қатораҳои деҳаи Маҳрам дидан намуд.
Раиси шаҳр Ғайбулло Боҳирӣ ва сафири Ҳиндустон дар Тоҷикистон  Аситх  Бхаттачардҷи зимни мулоқот ҷиҳати ҳамкориҳои судманди минбаъда ва боз ҳам беҳтар гардонидани фаъолияти соҳаҳои муҳими хоҷагии халқи шаҳр суҳбат доштанд.