Чунсян: ” Ман тағйироти назарраси Тоҷикистонро бо чашми худ дидам”

Душанбе, 20.04.2015. (АМИТ “Ховар”,Мавҷуда Анвари ).- “Ман ин дафъа Тоҷикистонро чун дӯсти қарини Президенти Тоҷикистон Эмомалӣ Раҳмон боздид намудам. Тайи 3 рӯзи сафарам муваффақиятҳои зиёде ба даст омаданд”,- гуфт баъди мулоқот бо Президент Эмомалӣ Раҳмон дар нишасти матбуотӣ барои журналистон котиби Кумитаи ҳизбӣ — роҳбари  Ноҳияи Мухтори Синзян- Уйғури Ҷумҳурии Мардумии Чин Чжан Чунсян.
Ч Чунсян зикр намуд, ки бо Президенти Тоҷикистон дар доираи маҳдуд ва ҳайати васеъ мулоқот анҷом дода шуд. Ғайр аз ин, дар ҷараёни мулоқот бо Сарвазир Қоҳир Расулзода перомуни ҳамкории мутақобилан муфид табодули афкор баргузор гардида, дар ҳамаи бахшҳо фикри ягона ба даст омад.
“Мо натиҷаҳои ба даст овардаамонро баъди соли 2010 миёни Ноҳияи Мухтори Синзян-  Уйғур ва Тоҷикистона ба имзо расидани Созишномаи ҳамкорӣ таҳқиқ намудем. Гуфтан мумкин аст, ки ҳамаи лоиҳаҳои ҳамкори, ки дар ин созишнома ба имзо расидаанд, пурра дар амал татбиқ шуданд. Ин исбот мекунад, ки ҳамкории байни НМСУ, Тоҷикистон ва Чин ояндаи калон дорад”,- гуфт Ч Чунсян.
“Ман пай бурдам, ки халқи тоҷик мардуми дӯст ва хирадманду меҳнатдӯст аст. Ман тағйиротӣ зиёдеро дидам, ки дар ҳамаи бахшу соҳаҳои шаҳру қишлоқҳо ба амал омаданд”,- афзуд дар хотима роҳбари Ноҳияи Мухтори Синзян- Уйғури ҶМЧ.