Душанбегиҳо, рамзи беҳтарини “Ваҳдати миллӣ”-ро интихоб намоед!

    Душанбе, 24.04.2015.(АМИТ “Ховар”, Марзия Саидзода).- Шаҳрдории Душанбе тасмим гирифтааст, ки дар оянда дар боғи фарҳангу фароғатии “Дӯстии халқҳо”-и пойтахт  Муҷтамаи меъмории рамзи “Ваҳдати миллӣ”-ро бунёд намояд. Дар иртибот, шаҳрдорӣ панҷ лоиҳаи рамзи “Ваҳдати миллӣ”-ро зери унвонҳои “Авҷ”, “Фар”, “Тоҷ”, “Соф” ва “Нур”, дар сомонаи расмии шаҳрдорӣ www.dushanbe.tj барои назарсанҷӣ ироа намудааст. Шаҳрвандон имкон доранд, ки фикру мулоҳизот ва пешниҳодоти худро нисбат ба панҷ лоиҳаи ироашуда, тавассути бахши “Пурсиш”-и сомонаи мазкур  то 30 апрели  соли равон пешниҳод созанд. 
Лоиҳаҳои мазкур тибқи муқаррарот ва дархости шаҳрдорӣ аз ҷониби беҳтарин мутахассисони бахши меъморӣ ва зиёиёни саршиноси кишвар таҳия гардидааст.