Файзобод: Хавфи омадани сел зиёд аст

Файзобод, 27.04.2015. (АМИТ «Ховар», Субҳониддини Маҳмуд).-Гурӯҳе аз сокинони деҳаҳои Боғи мирӣ, Сурхдара ва Файзободи ҷамоати деҳоти ба номи Дӯстмурод Алиеви ноҳияи Файзобод мегӯянд, ки  дар вақти боришоти зиёд аз хавфи омадани сел аз дарёчаи Сурхдара онҳо ором надоранд. Мувофиқи иттилои раиси ҷамоати деҳоти ба номи Дӯстмурод Алиеви ноҳия Зайдулло Зубайдов дар ҳақиқат дар сурати кандашавии танбаҳо ва омадани сел ба ҷони мардум хавф таҳдид мекунаду ба заминхои кишт хисороти калон мерасад. Аз ҳамин сабаб имсол аз ҳисоби деҳаҳои Боғи мирӣ ва Сурхдара як тонна сӯзишворӣ ва бо ёрдами техникии  ноҳия дар масофаи 500 метр соҳилмустаҳкамкунӣ анҷом дода шуд. Вале аз сабабе, ки ин дарёча аз кӯҳҳо сарчашма мегираду масофааш 10-11 километр аст, дар вақти боришоти аввали фасли баҳор  оби сел 50%-и   корҳои анҷомдодаро  шуста бурд. 
Ба андешаи баъзе сокинони ин минтақа танҳо соҳилмустаҳкамкунии  бетонӣ  метавонад садди роҳи селҳо шавад, аммо масофа, ки аз 500 метр зиёд аст, шароити моддияшон мувофиқат намекунад  ва ягона умедашон  барои мустаҳкамкунии соҳилҳои дарёча танҳо ба ҳукумати ҷумҳурист.