Фестивали ҳафтаи китоб дар Кӯлоб

Кӯлоб, 7.04.2015. (АМИТ «Ховар», Сулаймони Хол).-Ҳамасола аз 2 то 7-уми апрел дар ноҳияҳои ҷумҳурӣ фестивали ҷумҳуриявии «Ҳафтаи китоби кӯдакону наврасон» гузаронида мешавад, ки ҳадафи он баланд бардоштани савияи дониш ва ҷалби кӯдакону наврасон ба китобдӯстию китобхонӣ мебошад. 
Фестивали ҷумҳуриявии «Ҳафтаи китоби кӯдакону наврасон» таҳти шиори «Китоб сарчашмаи дониш аст» дар Театри вилоятии мусиқӣ-мазҳакавии ба номи Сайдалӣ Вализода дар шаҳри Кӯлоб доир гардида, дар он озмуни «Дастони моҳир» ва «Расми беҳтарин» низ гузаронида шуд. Ғолибон 9 апрел муайян гардида, бо туҳфаҳои Китобхонаи вилоятии бачагонаи шаҳри Кӯлоб қадршиносӣ мешаванд. Маҳсули дастони муҳассилини муассисаҳои таълимии шаҳру минтақаи Кӯлоб, аз қабили рассомӣ, наққошӣ, кандакорӣ, кашидадӯзӣ ва намоиши китобҳои бадеиву соҳавӣ ба маърази тамошо  гузошта шуд. 
Дар қисмати бадеии чорабинӣ муҳассилини муассисаҳои таълимии шаҳру ноҳияи Кӯлоб оид ба моҳияти китобу китобдорӣ порчаҳои назмиву насрӣ қироат намуданд.