Хуҷанд: Маҷмаи ёдгории шаҳидон таъмир мешавад

Хуҷанд, 9.04.2015. (АМИТ “Ховар”, Абдуаҳад Шарифзода).-Шаҳрдори Хуҷанд Раҷаббой Аҳмадзода ба масъулини сохторхои марбутаи мақомоти шаҳр дастур додааст, то баҳри таҷлили хотирмони 70 — солагии Ғалаба дар Ҷанги Бузурги Ватанӣ тадбирҳои зарурӣ андешанд. Тавре ки роҳбари хадамоти матбуоти мақомоти шаҳр Маҳмудҷон Муҳаммадӣ иттилоъ дод, роҷеъ ба дастури шаҳрдори Хуҷанд аз тарафи шуъбаҳои мухталифи мақомоти шаҳрӣ  нақшаи чорабиниҳо оид ба ташкили вохӯриҳо бо иштирокчиёни ҶБВ ва ҳамзамон  аёдати онҳо тартиб дода шуда, дар ин замина  баҳри абадӣ гардонидани номи фарзандони абармарди диёр  чанд лоиҳаи меъморӣ низ  тарҳрезӣ хоҳад шуд.
То рӯзҳои таҷлили ҷашн мавзеъҳои маҷмааи ёдгории «Шаҳидони Ҷанги Бузурги Ватанӣ» ва «Оташи абадӣ», воқеъ дар маркази шаҳр таъмир ва тармим шуда, роҳравҳо сафолакпӯш ва бо чароғакҳои замонавӣ таъмин шуда, мавзеи мазкур бо тарҳи нави гулзоркунӣ, ободонӣ ва фаввораҳо  зеб дода мешавад.