Хуҷанд: «Шаҳри ман» ба фаъолият шурӯъ намуд

Душанбе, 6.04.2015. (АМИТ «Ховар», Мавҷуда Анварӣ).-Дар фазои иттилоотии маркази вилояти Суғд- шаҳри Хуҷанд боз як радиои мустақил бо номи «Шаҳри ман» ҳафтаи гузашта ба фаъолият шурӯъ намуд.
Радиои мустақили «Шаҳри ман» соли 2014 аз қайди давлатӣ гузашта, соҳиби иҷозатнома гашт. Ширкати мазкур аз ҷониби якчанд ҷавони соҳибкори шаҳр таъсис ёфта, ҳамарӯза дар давоми 24 соат гуфторҳои он аз рӯи мавҷи 97.7 FM ба шунавандагон пешкаш мегардад.
Дар айни замон 7 нафар мутахассис ва эҷодкор барои таҳияи барномаҳо ҷалб гардида, теъдоди кормандон то интиҳои сол ба 15 нафар хоҳад расид.
Барои фаъолияти пурсамари гурӯҳи эҷодӣ тамоми шароитҳо фароҳам буда, музди миёнаи маоши кормандон ҳазор сомониро ташкил медиҳад.
Раиси шаҳри Хуҷанд Раҷаббой Аҳмадзода баъди оғоз бахшидан ба аввалин гуфторҳои ин радио нахустин меҳмон ва мусоҳиби журналистони он гардид.