Иштироки ҳайати ФФТ дар кори Конгресси КФО

Душанбе, 29.04.2015. (АМИТ «Ховар»).- 30  апрел  дар  пойтахти  Баҳрайн   шаҳри  Манама Конгресси Конфедератсияи  футболи  Осиё  баргузор  мегардад,  ки дар  кори он  намояндагони  ҳамаи федератсияҳои  миллии  футболи  қитъаи  Осиё  ширкат  мекунанд.
Дар  конгресс Федератсияи  футболи  Тоҷикистонро  ноиби якуми президенти федератсия  Хуршед  Мирзоев,  дабири  кулли он  Ислом  Маҳмадшоев,  ҳамчунин  узви  Кумитаи  иҷроияи ФФТ,  роҳбари Федератсияи  футболи  шаҳри  Душанбе  Дилшод  Ҷӯраев  намояндагӣ  мекунанд. 
Масоили  асосии  рӯзномаи конгресси  Манама  иборат  аз  интихоби президенти Конфедератсияи  футболи  Осиё,  ҳамчунин  Кумитаи  иҷроияи КФО  ва  ФИФА  мебошад. 
Ёдовар  мешавем, ки  Шайх  Салмон  бинни  Иброҳим ал — Халифа  аз  Баҳрайн, ки  аз  соли  2013 роҳбарии  созмони  мазкурро  ба  ӯҳда дорад, ягона  номзади сабтшуда  ба  мансаби президенти Конфедератсияи  футболи  Осиё  мебошад.
Қаблан Конфедератсияи  футболи  Осиё  рӯйхати  номзадҳо  ба  узвияти Кумитаи иҷроияи созмонро, ки  интихоботи он  30  апрел  дар  ҷараёни Конгресси  26 — уми  КФО  дар  пойтахти  Баҳрайн  шаҳри  Манама  баргузор  мегардад, эълом дошта буд.