Иштироки се номзад дар интихоботи Қазоқистон

Душанбе, 23.04.2015.(АМИТ «Ховар», Марзия  Саидзода).- 26 апрели соли равон дар Қазоқистон интихоботи ғайринавбатии президентӣ баргузор мегардад.  Аз Сафорати Қазоқистон дар Душанбе ба АМИТ «Ховар» иттилоъ доданд, ки  шаҳрвандони Қазоқистон, ки дар Ҷумҳурии Тоҷикистон қарор доранд,  дар асоси ҳуқуқҳои конститутсионии худ имкон доранд ба номзади мавриди назараи худ раъй диҳанд.
      Дар иртибот ҷиҳати баргузории ин чорабинии  муҳими сиёсӣ дар намояндагиҳои дипломатии Қазоқистон дар кишварҳои хориҷӣ  65 комиссияи интихоботии овоздиҳӣ созмон дода шудааст. Аз ҷумла,  дар назди Сафорати Қазоқистон дар Душанбе қитъаи раъйдиҳии №222 ташкил шудааст, ки он ҳамарӯза аз соати  9:00 то 18:00  ва дар рӯзи интихобот аз соати  07:00 субҳ то 20:00 шом фаъолият менамояд. Инчунин барои шаҳрвандони Қазоқистон, ки дар вилояти Суғд фаъолият доранд, дар бинои Консулгарии Қазоқистон дар Хуҷанд қуттии сайёри раъйдиҳӣ гузошта мешавад. 
   Бояд тазаккур дод, ки  дар интихоботи ғайринавбатии президентӣ дар Қазоқистон се номзад- Президенти  феълии ин кишвар Нурсултон Назарбоев, номзад аз Ҳизби «Нур Отан», Турғун Сиздиқов  аз Ҳизби коммунистии мардумӣ ва Абелғазӣ Қусаинов, раиси Федератсияи иттифоқҳои касабаи Қазоқистон  иштирок мекунад.