КҶВС беҳтарин суханварони ҷавонро муайян кард

Душанбе, 23.04.2015 (АМИТ «Ховар», Фарзонаи Давлат).-Зимни баргузории як чорабинии фарҳангӣ дар маркази фарҳангию фароғатии ҷавонон -“Ориёно” озмуни ҷумҳуриявии “Беҳтарин суханвари ҷавон” ҷамъбаст гардид. Озмуни мазкур бо ибтикори Ташкилоти ҷамъиятии ҷавонон “Созандагони Ватан” дар ҳамкорӣ бо Кумитаи ҷавонон, варзиш ва сайёҳӣ, ки таҳия гардида буд, дар ду давр баргузор гардид. Дар озмун бештар аз 78 нафар ҷавони касбу кори гуногун ширкат варзида, 10 нафари беҳтарин ба даври ниҳоӣ роҳ ёфтанд. 
Ба иттилои Наврӯз Қурбонов, мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ, ҷойи аввал насиби Аслиддин Хушвахтов гардида, ҷойи дуюмро Гулизор Пирова ва Фарзон Машарипов соҳиб шуданд.  Марҷона Орипова ва Аҳмадхӯҷа Давлатов сазовори ҷойи сеюм дониста шуданд. 
Дар чорабинии мазкур раиси Кумитаи ҷавонон, варзиш ва сайёҳӣ Аҳтам Абдуллозода, ки бевосита ширкат дошт, мақсад аз баргузории озмунро дастгириву ҳавасмандгардонии ҷавонони соҳибистеъдод, баланд бардоштани донишҳои зеҳнӣ, қобилияти суханварии ҷавонон ва ба ин васила дарёфти истеъдодҳои ҷавон арзёбӣ намуд. 
Гуфта мешавад, дар анҷоми чорабинӣ ба ғолибони озмуни мазкур  Диплом — барои се ҷойи ифтихорӣ, Сипоснома, маблағҳои пулӣ ва туҳфаҳои хотиравӣ тақдим шуданд.