Конфронс бахшида ба ҷашни Ғалаба

Кӯлоб, 30.04.2015. (АМИТ «Ховар», Сулаймони Хол).- Истиқбол аз 70- умин солгарди Ҷанги Бузурги Ватанӣ- ин арҷгузорӣ ба хизмати софдилонаи иштирокчиён, бедор намудани зиракии сиёсӣ дар тинати насли ҷавон ва маҳбубият доштан ба марзу буми меҳан мебошад. 70-солагии Донишгоҳи давлатии Кўлоб ба номи Абуабдуллои Рўдакӣ ба 70- солагии Ғалаба дар Ҷанги Бузурги Ватанӣ рост омад, ки дар шаҳри Кўлоб як зумра чорабинию конфронсҳои илмӣ- назариявӣ доир гардида истодаанд.  Дар Донишгоҳи давлатии Кӯлоб ба номи Абуабдуллоҳи Рӯдакӣ конфронси илмӣ-назариявӣ бо иштироки масъулини мақомоти ичрооияи ҳокимияти давлатии шаҳри Кўлоб, сафири Чумҳурии Беларус дар Тоҷикистон, собиқадорони ҷангу меҳнати шаҳру ноҳияҳои минтақа ва олимону донишҷӯёни Донишгоҳи давлатии Кўлоб барпо гардид. Зикр шуд, ки шумораи иштирокчиёни Ҷанги Бузурги Ватанӣ дар шаҳру деҳоти Кўлоб 29 нафар боқӣ мондааст, ки зери ғамхориҳои давлату ҳукумати Тоҷикистон қарор доранд. Сафири Ҷумҳурии Беларус дар Тоҷикистон аз ҷоннисориҳои тоҷикписарон дар озод намудани шаҳру деҳкадаҳои собиқ Иттиҳоди Шӯравӣ ёдовар гардида, афзуд, ки феълан хизматҳои чунин диловарони Ватан қадр мешаванд. Тадбирҳои ҷашнӣ дар шаҳру деҳоти Кўлоб шуруъ аз моҳи апрел идома дошта, иштирокчиёни ҷангу меҳнат аз даҳшатҳои Ҷанги Бузурги Ватании солҳои 1941-1945 нақл менамоянд.