Конфронси ноҳиявӣ бахшида ба Соли оила

Душанбе, 13.04.2015.(АМИТ «Ховар», Лайло Тоирӣ).-Бахши кор бо занон ва оилаи мақомоти иҷроияи ҳокимияти давлатии ноҳияи Носири Хусрав ҳафтаи гузашта бахшида ба Соли оила конфронси ноҳиявӣ гузаронд, ки дар он фаъолони ноҳия, кормандони ташкилоту муассисаҳо, муассисаҳои таълимӣ, намояндагони дин ва тамоми қишрҳои ҷомеа иштирок намуданд.Мутахассисони соҳаҳои маориф, сабти асноди ҳолати шаҳрвандӣ, тандурустӣ ва дин оид ба паҳлуҳои гуногуни масоили оила ва маърифати оиладорӣ дар мавзуъҳои «Оила-асоси ҷамъият ва рушди миллат», «Робитаи мактаб бо оила ҷиҳати таълиму тарбияи фарзанд», «Оила ва маърифати оиладорӣ аз дидгоҳи дини мубини ислом», «Ташаккули тарзи ҳаёти солим дар оила. Омилҳои тиббӣ-генетикии зарари никоҳи хешутаборӣ» ибрози ақида намуданд.Дар конфронси мазкур муовини раиси ноҳия Б.Саидова фаъолонро даъват намуд, ки баҳри таҳким ва устувории оилаҳо, пешгирии никоҳи хешутаборӣ, аз муоинаи тиббӣ гузаштани издивоҷкунандагон ва баланд бардоштани фарҳанги оиладорӣ дар байни аҳолӣ корҳои фаҳмондадиҳиро ҷоннок намоянд.