Муаррифии фарҳанги ғановатманди миллати тоҷик

Душанбе, 21. 04. 2015. (АМИТ «Ховар»,Фарзона Достонзода).- Ба хотири дастгирӣ ва татбиқи сиёсати фарҳангӣ ва илмӣ барои ворид намудан ба феҳристи фарҳангии ғайримоддии ЮНЕСКО ҳамасола ногӯйҳо аз ҷониби давлатҳои аъзо, аз ҷумла Ҷумҳурии Тоҷикистон пешниҳод мегарданд, ки он имконияти хуби муаррифии фарҳанги ғании миллати тоҷик дар арсаи байналмилалӣ ба ҳисоб рафта, барои гиромидошт, ҳифз ва ба наслҳои оянда расонидани он имконият фароҳам меоранд. 
Тибқи иттилои раёсати рушди муассисаҳои фарҳангӣ-фароғатӣ ва ҳунарҳои мардумии Вазорати фарҳанги Ҷумҳурии Тоҷикистон дар айни ҳол, аз ҷониби мутахассисони вазорат омӯзиши илмӣ, ҳуҷҷатнигорӣ ва таҳияи матни мукаммали номгӯйи «Оши палав» (бахши таомҳо ва анъанаҳои миллӣ), инчунин номгӯйи мусиқии суннатии тоҷик Фалак (санъати иҷрокунандагӣ) ба мероси фарҳангии ғайримоддии ЮНЕСКО анҷом дода шуда, ҳуҷчатҳо барои ворид намудан ба Феҳристи  фарҳангии ғайримоддии ЮНЕСКО пешниҳод гардиданд. 
Зимнан  дар ҷаласаи навбатии Кумитаи байниҳукуматии ЮНЕСКО оид ба мероси ғайримоддии фарҳангӣ, ки соли равон дар Намибия доир мегардад, номгӯйи «Чакан» барои ворид намудан ба Феҳристи фарҳангии ғайримоддии ЮНЕСКО мавриди баррасӣ қарор хоҳад гирифт. Бояд тазаккур дод, ки пешниҳоди номгӯйҳои мазкур имконияти мусоиди муаррифии фарҳанги ғановатманди миллати тоҷик дар арсаи байналмилалӣ ба ҳисоб рафта, барои гиромидошт, ҳифз ва ба наслҳои оянда интиқол додани он имконият фароҳам меоранд. 
Ҳоло аз ҷониби Вазорати фарҳанги Ҷумҳурии Тоҷикистон корҳо дар самти таҳқиқи ҳунари «Читгарӣ» ва номгӯйи «Атлас», таҳия ва пешниҳоди номгӯйҳои ин намунаи барҷастаи мероси фарҳангии ғайримоддии халқи тоҷик ба Феҳристи мероси фарҳангии ғайримоддии ЮНЕСКО идома доранд.