Муборизаи Тоҷикистону Чин зидди ситезаҷӯӣ идома дорад
Душанбе, 21.04.2015.(АМИТ “ Ховар”, Муқаддас Темурзода).- 20 апрел дар шаҳри Душанбе мулоқоти вазири корҳои дохилии Тоҷикистон Раҳимзода Рамазон Ҳамро ва ҳайати Вазорати амнияти ҷамъиятии Ҷумҳурии Мардумии Чин, ки роҳбарии онро сардори раёсати вазорати мазкур Лю Шаоу ба ӯҳда дорад, баргузор гардид. Назар ба хабари ВКД ҶТ, Рамазон Раҳимзода барои ҳамкории мутақобилан муфид ва ба ВКД ҶТ расонидани ёрии техникию моддӣ изҳори миннатдорӣ кард. Зикр шуд, ки ҳамкории ҳарду вазорат дар сатҳи баланд қарор дошта, фаъолияти байни вазоратҳо ба Созишномаи ҳамкори миёни Вазорати корҳои дохилии ҶТ ва Вазорати амнияти ҷамъиятии ҶМЧ, ки 27 майи соли 2002 дар шаҳри Душанбе имзо шуда буд, истинод мекунад. Ҷонибҳо масоили марбут ба мубориза бо ситезаҷӯӣ ва хавфу хатар, аз қабили терроризм ва ифротгароӣ, гардиши ғайриқонунии маводи мухаддирро муҳокима намуданд. Дар анҷоми мулоқот зикр шуд, ки мубориза бо ситезаҷӯӣ ва хавфу хатар бидуни ҳамоҳангсозии саъю кӯшишҳои ҷомеаи ҷаҳон имконнопазир аст.