Мукофотҳои пулӣ насиби хориҷиҳо гардиданд

           Душанбе, 20.04.2015.(АМИТ “Ховар”, Марзия Саидзода).- Ду варзишгари Русия -Юрий Чечун /Самара/ ва Юлия Чиженко /Санкт-Петербург/ дар  шашумин ниммарафони байналмилалии Душанбе мутаносибан ғолиби зинаи аввали мусобиқот гардида, шаҳрдории Душанбе  ба ҳар кадоме  аз варзишгарон дар маросими тантанавӣ  3 ҳазору  500 $  тақдим намуд.
    Ҷойҳои дуюми мусобиқотро ду варзишгари тошкандӣ -Андрей Петров ва Марина  Химелевская касб намуда, ҳар ду сазовори 3000 $ гардиданд.
    Самуэл Вайтака- варзишгари кениёӣ ва Гулжанат Жаннатбек,    варзишгар аз Қазоқистон ҳар ду зинаи сеюми мусобиқотро фатҳ намуда,  2500 $ мукофот гирифтанд. 
   Ҷойҳои чорум- насиби Степан Киселев, варзишгар аз Қазон ва Катя  Фатеева  аз Челябинск гардида, ба ҳар кадоме 2000 $ супорида шуд.
  Ба Муго Энтонии кениёӣ ва Ираида Александроваи рус /Қазон/ мушарраф гардид, ки зинаи панҷуми мусобиқотро фатҳ намуда, соҳиби  1800 $ гарданд.  Зинаи шашуми мусобиқот насиби Иля Пяткин аз Қирғизистон ва варзишгари эронӣ Зайнаб Мансурӣ /Шероз/ гардида, ба ҳар кадоме дар маросими тантанавӣ 1500 $ тақдим шуд. 
     Бояд зикр кард, ки дар ниммарафони байналмилалӣ, ки ҳамасола ба ифтихори Рӯзи пойтахт гузаронида мешавад, дар радифи варзишгарони ватанӣ,  инчунин варзишгарони хориҷӣ ширкат менамоянд. Ҳадафи баргузории ин мусобиқот рушди варзиш, тарғиби тарзи ҳаёти солим ва таҳикими дӯстиву рафоқат арзёбӣ мегардад. Мутаассифона, дар ин мусобиқот ягон нафар аз варзишгарони тоҷик ғолиб набаромад ва мукофотҳои пулӣ насиби варзишгарони хориҷӣ гардиданд.