Муколамаи маблағгузорӣ оид ба иқлим

Душанбе,11.04.2015. (АМИТ «Ховар», Мавҷуда Анварӣ).-9-10-уми апрели соли 2015 дар пойтахти Кореяи Ҷанубӣ Муколамаи маблағгузорӣ оид ба иқлим доир гардид, ки дар он раиси Кумитаи ҳифзи муҳити зисти кишвар Ибодзода Хайрулло иштирок намуд. Вохўрӣ, ки аз тарафи Фонди Иқлими Сабз (ФИС), Бонки Рушди Осиё (БРО) дар ҳамкорӣ бо Вазорати молияи Кореяи Ҷанубӣ ташкил шуд, ба сохторҳои ваколатдори миллӣ (СВМ) имконият дод, ки иштироки тарафҳоро дар барномаи фонди мазкур пурра баррасӣ намоянд. Ҳамзамон дар вохўрӣ масъалаҳои омодагии Фонд барои ҷудо намудани маблағ барои мутобиқшавӣ ва коҳиш ба тағйирёбии иқлим дида шуданд. 
Дар раванди вохўрӣ кишвари Корея тасмим гирифтааст, ки оид ба таҷрибаҳои дар самти пешбурди сиёсати «Рушди сабз» ва амалишавии бомувафақияти лоиҳаҳо оид ба манъбаҳои барқароршавандаи энергия табодули таҷриба намояд.  
Дар муколама раиси кумита Ибодзода Хайрулло бо Мария Кармела-директори генералии Департаменти минтақавии рушди устувори Бонки Рушди Осиё, Тао Ванг-директори мутобиқшавӣ ва коҳиши Фонди Иқлими Сабз ва Денис Мючел-мушовир оид ба маблағгузории иқлимии назди Агентӣ оид ба ҳамкории байналмилалӣ вохўрӣ баргузор намуд.