Мулоқоти намояндаи доимии Тоҷикистон бо мудири кулли ЮНЕСКО

Душанбе, 17.04.2015 (АМИТ «Ховар»).- 15 апрели соли 2015 дар шаҳри Париж дар қароргоҳи Созмони Милали Муттаҳид оид ба масъалаҳои маориф, илм ва фарҳанг (ЮНЕСКО) вохӯрии Намояндаи доимии Ҷумҳурии Тоҷикистон дар назди ЮНЕСКО сафир Рустамҷон Солиев бо Мудири кулли ЮНЕСКО хонум Ирина Бокова баргузор гардид.Зимни суҳбат ҷонибҳо масъалаҳои ҳолати кунунӣ ва дурнамои рушди ҳамкории Ҷумҳурии Тоҷикистон бо ЮНЕСКО дар соҳаҳои илм, маориф ва фарҳанг, инчунин татбиқи як силсила лоҳаҳои ҳамкории дуҷонибаро муҳокима намуданд.Намояндаи доимии Тоҷикистон дар назди ЮНЕСКО Р. Солиев ба Мудири кулли Созмон И.Бокова оид ба ҷараёни омодагиҳо ба Конфронси байналмилалии сатҳи баланд роҷеъ ба натиҷаҳои татбиқи Даҳсолаи байналмилалии амал «Об барои ҳаёт», 2005-2015, ки 9-11 июни соли 2015 дар Душанбе баргузор мегардад, иттилоъ дод. Дар ин робита, хонум Ирина Бокова ташаббусҳои Ҷумҳурии Тоҷикистонро ҷиҳати ҳалли масоили марбут ба об дар сатҳи минтақавию байналмилалӣ баланд арзёбӣ карда, иштироки ҳайати баландпояи ЮНЕСКО-ро дар кори конфронс тасдиқ намуд. Сафир Рустамҷон Солиев бо намоиши аксҳои ҷолиб ба мудири кулл Ирина Бокова дар бораи маҷмааи давлатии фарҳангию фароғатии Кохи Наврӯз дар шаҳри Душанбе нақл кард. Арзишу зебогии фарҳангию меъмории ин иншоот махсус таъкид гардид.Дар чаҳорчӯби мулоқот ба Мудири кулли ЮНЕСКО доир ба номгӯйҳои Санъати чакандӯзӣ дар Тоҷикистон, Фарҳанги оши палов ва Фалак, ки ба баррасии созмон ҷиҳати шомил кардан ба Феҳристи мероси ғайримоддии фарҳангии башарият пешниҳод шудаанд, маълумоти муфассал манзур гардид. Ҳамчунин сафири Тоҷикистон Р.Солиев бо намояндаи воломақоми ЮНЕСКО масоили дастгирии номгӯйҳои 100-солагии Ғаффор Валаматзода ва 1150-солагии Закариёи Розӣ-ро бо мақсади воридсозӣ ба феҳристи ҷашнвораҳое, ки аз ҷониби созмон дар солҳои 2016-2017 таҷлил мегарданд, муҳокима намуд.