Мусодираи маводи мухаддир аз ҷониби милитсияи нақлиёт

Душанбе, 23.04.2015. (АМИТ «Ховар», Муқаддас Темурзода).- Аз ҷониби кормандони Раёсати ВКД дар нақлиёт 21 апрел дар натиҷаи гузаронидани чорабиниҳои фаврӣ-ҷустуҷӯӣ ҳамчун гумонбар дар муомилоти ғайриқонунии маводи мухаддир  ҷавони 22-солаи сокини шаҳри Душанбе дастгир гардид.
Тибқи иттилои ВКД ҶТ, дар вақти азназаргузаронӣ аз дохили борхалтааш 2 кг 420 грамм маводи сахттаъсири героин дарёфт ва мусодира шуд.
Худи ҳамин рӯз, аз ҷониби кормандони милитсия зимни як амалиёти махсус марди 40-солаи сокини ноҳияи Восеъ, пеш бо моддаи 244 Кодекси ҷиноятии ҶТ суд шудааст, бо гумони ғайриқонунӣ нигоҳ доштани маводи нашъадор дастгир гардид, ки дар вақти кофтуков аз дохили борхалтааш 2 кг 660 гр. маводи нашъадори навъи ҳашиш дарёфт ва мусодира шуд.
Ҳамчунин зимни гузаронидани боз як чорабинии фаврӣ- ҷустуҷӯӣ марди 58-солаи сокини шаҳри Қӯрғонтеппа бо гумони даст доштан дар муомилоти ғайриқонунии маводи мухаддир дастгир гардид. Ҳангоми кофтукови шахсӣ аз дохили борхалтааш 3 кг 870 гр. маводи нашъадори навъи ҳашиш ва 3 кг 610 гр. маводи нашъадори навъи афюн, ки вазни умумиашон 7 кг 480 гр-ро ташкил медиҳад, дарёфт ва мусодира шуд.
Нисбат ба далелҳои мазкур парвандаҳои ҷиноятӣ оғоз гардида, тафтиш идома дорад.