Намоиши як китоби Восифӣ бахшида ба 530- солагии адиб

Душанбе, 28.04.2015.(АМИТ “Ховар”, Рафоати Абдулҳамид).- Ба иттилои Китобхонаи миллии Тоҷикистон  24 апрели соли равон Китобхонаи миллии Тоҷикистон ба ифтихори 530- солагии зодрўзи шоир ва муаррифи форсу тоҷик Зайниддин Маҳмуди Восифӣ намоиши ягона асари илмиву маърифатӣ ва адабии ӯ «Бадоеъ- ул- вақоеъ» баргузор гардид. Ин китоб бо се забон: тоҷикӣ, форсӣ ва русӣ чоп шудааст. Дар канори он китобчаҳои дигар, ки ба сурати пораҳо аз “Бадоеъ- ул- вақоеъ” дар солҳои гуногун чоп шудаанд, низ гузошта шуданд. 
 Ҳамзамон чанд китоби илмиву таҳқиқотӣ дар бораи рӯзгор ва осори адиби маъруф чоп шуда, аз ҷумла китоби Б. Шарифов «Хусусияти морфологии «Бадоеъ- ул- вақоеъ»- и Восифӣ», С. Айнӣ «Восифӣ ва хулосаи «Бадоеъ- ул- вақоеъ», К. Маҷидова «Ақидаҳои педагогии З.М. Восифӣ (қисми 2)» низ дар ин намоиш роҳ ёфтанд.  
Ёдовар бояд шуд, ки Зайниддин Маҳмуди Восифӣ  як симои барҷастаи адабиёти охири асри 15 ва аввали асри 16- и тоҷик ба шумор меравад.  Ў соли 1485 дар шаҳри Ҳирот ба дунё омада, аз худ мероси  гаронбаҳо боқӣ гузоштааст.  
 Гуфтанист, ки «Бадоеъ- ул- вақоеъ» ягона асари то замони мо расидаи Зайниддин Маҳмуди Восифист, ки дар Тоҷикистон бо хати кириллӣ борҳо чоп шудааст. 
 Аввалин чопи интиқодии он бо шарҳи комили калима ва ибораҳои душворфаҳми он ва тарҷумаи ҳоли адиб аз ҷониби устод Садриддин Айнӣ сурат гирифта буд. Баъдан нашри муфассалтари онро академик Болдирев анҷом дод.  
Китоб аз силсилаҳикоёте иборат аст, ки ҳар кадом арзиши як достонро дорад.