Натиҷагирӣ аз фаъолияти семоҳаи Вазорати мудофиа

Душанбе, 23.04.2015. (АМИТ  «Ховар», Лайло Тоирӣ).-Масоили вобаста ба баланд бардоштани қудрати дифоии кишвар, тақвияти сатҳи омодагии ҷангии ҷузъу томҳои Қувваҳои Мусаллаҳ ва дар ин замина пурзӯр намудани интизоми ҳарбӣ аз талаби доимӣ ва қотеъонаи Сарфармондеҳи Олии Қувваҳои Мусаллаҳ ба шумор рафта, ба ин масоил аз ҷониби ҳайатҳои роҳбариву фармондеҳии Вазорати мудофиаи мамлакат корҳои муҳим амалӣ мешаванд.
Ҳафтаи  гузашта  дар толори Вазорати мудофиаи кишвар вобаста ба дастуру супоришҳои Президенти Ҷумҳурии Тоҷикистон дар самтҳои фаъолияти Қувваҳои Мусаллаҳ ҷамъомад доир гардид. 
Сардорони раёсатҳои дахлдори Вазорати дифоъ доир ба ташкили сатҳи тайёрии ҷангии ҷузъу томҳо, вазъи қонунияту тартиботи ҳуқуқӣ, самаранок истифода намудани маблағҳои буҷетӣ, ҷараёни даъвати шаҳрвандон ба хизмати ҳарбӣ, таъмин ва беҳдошти шароитҳои рӯзмараи хизмативу маишӣ ва дигар масоили марбут ба фаъолияти соҳаҳои мухталифи ин ниҳоди қудратиро таҳлилу баррасӣ намуда, бо пешниҳоди мушаххас ибрози андеша намуданд.
Таъкид шуд, ки ҳар як хизматчии ҳарбӣ барои таъмини амнияти давлат доимо омода бошад ва баҳри пешгириву ошкор намудани ҳар гуна қонунвайронкуниҳо, бахусус ҷиноятҳои коррупсионӣ, муомилоти ғайриқонунии маводи мухаддир ва дигар аъмоли ношоиста аз тамоми воситаҳои қонунӣ самаранок истифода намоянд.