Омодагии ширкатҳои сайёҳӣ ба намоишгоҳи ITB — Берлин 2015

Душанбе, 07.04.2015 (АМИТ «Ховар», Фарзонаи Давлат).- Аҳтам Абдуллозода, раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо роҳбарони ширкатҳои туристии кишвар ҷиҳати омодагӣ ба намоишгоҳи калонтарини туристии дунё ITB — Берлин- 2015 мулоқот кард. 
Бино ба иттилои Наврӯз Қурбонов, мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ, зимни мулоқот масъалаҳои иштироки ҳайати Тоҷикистон дар намоишгоҳи калонтарини туристии дунё:  ITB — Берлин, 2015 ва нақшаҳо барои соли 2016, пешниҳод кардани ҳисоботҳо, мусоидат  ба ҷараёни иҷроиши нақшаи чорабиниҳои ҳукумати мамлакат оид ба муаррифии имкониятҳои туризми дохилӣ, иштирок дар ҷараёни навсозии сомонаи интернетии  www.visittajikistan.tj, баргузории Конфронси байналмилалии туристии «Туризми Тоҷикистон: Имкониятҳо ва заминаҳои нави ҳамкорӣ» ва Фестивали сайёҳиву фарҳангии Мероси Роҳи Абрешим таҳти унвони «Рангоранг», ки ба нақша гирифта шудааст, мавриди муҳокима қарор гирифтанд. 
Инчунин раиси кумита дар чорабинӣ таҳия ва ташкили 60 хатсайри дохилӣ,  эҳёи туризми мактабӣ ва рушди саёҳатҳои шаҳрӣ, фармоиши раиси кумита «Оид ба санҷиши фаъолияти субъетҳои хоҷагидори соҳаи туризм дар соли 2015» ва натиҷаи фаъолияти ширкатҳои сайёҳӣ дар самти хизматрасонӣ, фурӯши чиптаҳои ҳавопаймоӣ, гирифтани раводид ва умуман фаъолияти онҳоро ба баррасӣ гирифт.