Ошкор гардидани қонунвайронкуниҳо дар самти меҳнат

Душанбе, 21.04.2015. (АМИТ  «Ховар», Лайло Тоирӣ).-Назорати давлатӣ дар соҳаи меҳнат,  муҳоҷират ва  шуғли  аҳолӣ  ҷиҳати  пешгирию бартарафсозии як зумра қонунвайронкунӣ ва ҷуброни ҳуқуқҳои меҳнатӣ ва иҷтимоии шаҳрвандон бевосита мусоидат намуд. Тайи ин давра аз ҷониби мақомоти мазкур 550 санҷиш гузаронида  шуд, ки аз он 245 санҷиш ба масъалаҳои меҳнат, 153 санҷиш ба масъалаҳои бехатарии меҳнат ва риояи стандартҳо, 40 адад санҷиш ба масъалаҳои муҳоҷират ва 112 санҷиш ба масъалаҳои шуғли аҳолӣ рост омада, дар маҷмӯъ 189 корхонаву муассисаи давлатӣ, 317 корхонаю ташкилоти хусусӣ ва 44 субъекти хоҷагидори шакли дигари моликиятро фаро гирифт.
Дар натиҷаи ҳамаи назорату санҷишҳои анҷомёфта 1764 адад қонунвайронкунӣ (дар се моҳи соли 2014 — 1580 адад) ошкор гардид, ки 813 ҳолат ба масъалаҳои меҳнат, 424 ҳолат ба масъалаҳои бехатарии меҳнат ва риояи стандартҳо, 96 ҳолат ба масълаҳои муҳоҷират ва 431 ҳолат ба масъалаҳои шуғл иртибот доранд.
Дар ин бора ба АМИТ «Ховар» аз Раёсати байналмилалӣ ва робита бо ҷомеаи Вазорати меҳнат, муҳоҷират ва шуғли аҳолӣ хабар доданд.