Пиёзи Қумсангир нархи бозори Хуҷандро поён бурд

Душанбе, 25.04.2015. (АМИТ «Ховар», Мавҷуда Анварӣ).-  Ҳамсола дар миёнаи фасли баҳор болоравии нархе баъзе аз намудҳои махсулот аз қабили пиёз ба мушоҳида мерасад.
Бо мақсади паст намудани нархи чанд намуди маҳсулот, аз қабили пиёзу картошка, гӯшту сабзӣ мақомоти маҳаллии шаҳри Хуҷанд чанд тадбири мушаххас андешидааст.
Яке аз ин чораҳо бо ташаббуси раиси шаҳри Хуҷанд Раҷаббой Аҳмадзода ва дастгирии раиси вилояти Суғд Абдураҳмон Қодирӣ ба бозори марказии маҳсулоти кишоварзии «Панҷшанбе» ворид гардидани зиёда аз 50 тонна пиёзи барвақтӣ аз ҷониби деҳқонони ноҳияи Қумсангири вилояти Хатлон аст. Маҳз ин тадбир имкон дод, ки нархи як килограмм пиёз аз 4 сомонӣ ба 1 сомонию 80 дирам-2 сомонӣ паст фарояд.
Ҳоло бо дастури раиси шаҳр барои бемаҳдудият ворид намудани маҳсулот ва таъмини ройгони хӯроку ҷойи хоб шароит фароҳам оварда шудааст. Ҳамзамон дар натиҷаи андешидани ин гуна тадбирҳо ҳоло дар бозор нархи гӯшт то 30 сомонӣ буда, тамоюли пастравии нархҳои дигар намуди маҳсулот мушоҳида мешавад.