Робитаҳои тиҷоратии Туркия ва Тоҷикистон густариш меёбанд

Душанбе,14.04.2015.(АМИТ “Ховар”).- 13 апрел раиси Палатаи савдо ва саноати Тоҷикистон Шариф Саид бо сафири Туркия дар Тоҷикистон Меҳмет Мунис Дерик мулоқот анҷом дод. Бино ба иттилои ПСС ҶТ, ҷонибҳо масоили рушди равобити иқтисодию тиҷоратии байни Тоҷикистону Туркияро мавриди муҳокима қарор доданд. Раиси ПСС ҶТ омодагии худро ба ташкили муколамаи мустақими байни саноатчиёну соҳибкорони Тоҷикистон ва Туркия иброз дошт. Шариф Саид ҳамчунин ба сафир пешниҳод намуд, ки ба иштироки соҳибкорони бахши саноати сабуки Туркия дар кори намоишгоҳи байналмилалии “ ИНТЕРЛЕГПРОМ – 2015” , ки дар нимаи аввали моҳи июни соли ҷорӣ дар шаҳри Душанбе баргузор мешавад, мусоидат кунад. Сафири Туркия дар навбати худ зикр намуд, ки ширкатҳои асосии Туркияро барои иштирок дар кори намоишгоҳи байналмилалии “ИНТЕРЛЕГПРОМ – 2015” дастгирӣ хоҳад кард.