Сайди 28 тонна моҳӣ дар семоҳаи аввал

Душанбе, 11.04.2015. (АМИТ “Ховар”, Рафоати Абдулҳамид).- Ҳаҷми маҳсулоти моҳипарварӣ дар моҳҳои январ-марти соли 2015- ум 521,1 ҳазор сомониро ташкил кард, ки нисбат ба ҳамин давраи соли 2014- ум 5,7 фоиз  зиёд  шудааст.
Бино ба иттилои сомонаи расмии раиси вилояти Суғд дар моҳҳои январ-марти соли 2015  дар хоҷагиҳои моҳипарварии вилоят сайди моҳӣ 28  тоннаро ташкил намуд.
Дар ҳаҷми умумии истеҳсоли моҳӣ намуди моҳии пешонағафси сафед — 13,4 фоиз, намуди зағорамоҳӣ — 8,3 фоиз, амури сафед — 4,4 фоиз, намуди суфмоҳӣ (судак) — 16,4 фоиз ва 57,5 фоизро дигар намуди моҳиҳо — ҷумҷумамоҳӣ, аспакмоҳӣ ва шамшермоҳӣ ташкил мекунанд.