Сайри осорхонавӣ бо иштироки ходимони илмӣ

Душанбе, 3.04.2015.(АМИТ «Ховар», Раъно Нусратуллозода).-Бо ибтикори Осорхонаи маорифи Академияи таҳсилоти Тоҷикистон дирӯз вохӯрии муаллифони китобҳои дарсӣ ва олимони соҳаи педагогика Маҳмадулло Лутфуллоев, Убайд Зубайдов, Ғуломқодир Бобиев, Саидамир Аминов, Ирина Каримова, Саидбой Шербоев ва Саъдулло Неъматов бо хатмкунандагони муассисаҳои таҳсилоти миёнаи умумии рақамҳои 15, 55, 79 ва 65-и ноҳияи Шоҳмансур доир гардид. Дар вохӯрӣ  омӯзгорон ва хонандагон ба суолҳои худ посухҳои муфид гирифтанд. Инчунин баъди анҷоми чорабинӣ бо ширкати онҳо сайри осорхонавӣ гузаронида шуд.
Қобили зикр аст, ки ҳадаф аз баргузории вохўрӣ мусоидат ба интихоби касб ва муайян намудани паҳлуҳои мушкилфаҳми китобу барномаҳои таълимӣ ҷиҳати дилпурона ширкат варзидани талабагон дар мавсими «Довталаб-2015» — қабул ба муассисаҳои таҳсилоти олӣ ва миёнаи касбӣ тавассути Маркази миллии тестӣ маънидод гардид.
Дар ҷараёни сайри осорхонавӣ ба саволҳои хонандагон ходимони илмии осорхона посух доданд.