Шаҳрвандони Тоҷикистон аз Яман бароварда шуданд

Душанбе, 06.04.2015. (АМИТ “Ховар”, Марҳабои Азамат).- Аввалин 5 нафар шаҳрвандони Тоҷикистон, ки онҳоро Вазорати ҳолатҳои фавқулоддаи Федератсияи Русия аз пойтахти Яман ба ба шаҳри Маскав бурда буд, шоми рӯзи шанбеи гузашта озими шаҳри Душанбе шуданд, ки иборат аз 4 нафар калонсолон ва як кӯдак мебошанд.
Дар ин бора аз Сафорати ҶТ дар ФР хабар доданд.
Манбаъ зикр намуд ки дар байни гурӯҳи калони нафароне, ки аз Яман омадаанд, тоҷикистониёни табааи Русия ва онҳое  низ ҳастанд, ки  бо яманиҳо издивоҷ кардаанд. Бинобарин, онҳо хоҳиш намудаанд ки дар Федератсияи Русия бошанд.
“Дар ситоди Сафорати ҶТ дар ФР, ки роҳбарии онро Ашраф Гулов ба ӯҳда дорад, изҳор доштанд ки то давраи аз Яман баровардани шаҳрвандони мо тартиби навбатдории аъзои ситод ҷорӣ карда шудааст. Навбатдорон бо Маркази вазъияти фавқулоддаи Вазорати корҳои хориҷии Федератсияи Русия робитаи доимӣ доранд. Вазъият бо ёрию дастгирии ҳамтоёни русиягӣ таҳти назорат қарор дорад.
Сафорат барои аз минтақаи ихтилофот баровардани ҳамдиёрони мо ҳамаи чораҳои заруриро мебинад”,- зикр намуданд дар хадамоти матбуоти сафорат.