Созандагиву бунёдкорӣ дар Кўлоб

Кўлоб,11.04.2015. (АМИТ «Ховар», Фарҳоди Мадамин).-То имрўз дар шаҳри Кўлоб зиёда аз даҳ иншооти соҳибкорӣ мавриди истифода қарор гирифтааст. Аз ҷумла, дар шафати шоҳроҳи даромадгоҳи шаҳр Маркази хизматрасонии «Тоҳир» қомат афрохт, ки минбаъд ҳамаи намуди нақлиёти шахсиву мусофиркаш ва мошинҳои калонҳаҷми боркаш метавонанд аз ин марказ истифода баранд. Кормандони ин марказ омўзишро дар шаҳри Хуҷанд  оид ба муоинаи нақлиёт, васли чархахо, тавозундарор ва дигар намудҳои хизматрасонии нақлиёт гирифтанд. Дар шафати ин марказ боз қаҳвахона, нуқтаи хӯроки сарироҳӣ ва мағозаи хўрокворӣ таъсис дода шудааст. Дар марказ зиёда аз 30 нафар  бо ҷои кор таъмин гардид. Соҳибмулк Абдулло Самиев мақсад дорад, ки як гурўҳ ҷавононро  барои омўзиш ба давлати Олмон оид ба таъмири мошинҳои хориҷӣ фиристад. Маркази мазкур ба таври шабонарўзӣ фаъолият менамояд.