ТҶММ — як ҷузъи раванди рушди миллӣ

Душанбе, 23.04.2015. (АМИТ  «Ховар», Лайло Тоирӣ).-Дар мувофиқа бо Ҳукумати ҷумҳурӣ Анҷумани 6-уми Ташкилоти ҷамъиятии мададгори мудофиа баргузор гардид. Дар кори он намояндагони Ҳукумати ҷумҳурӣ, Шӯрои амният, мақомоти ҳифзи ҳуқуқ ва сохторҳои низомии мамлакат, инчунин ҳайатҳои намояндагии созмонҳои мудофиавӣ ва ҳарбӣ-техникии кишварҳои узви Иттиҳоди Давлатҳои Мустақил иштирок доштанд. Дар Анҷуман бо пешниҳоди Президенти Ҷумҳурии Тоҷикистон аз тариқи овоздиҳии кушода аз ҷониби вакилон генерал-майор Файзалӣ Лангариев ба вазифаи раиси Кумитаи Марказии Ташкилоти ҷамъиятии мададгори мудофиаи Ҷумҳурии Тоҷикистон интихоб гардид.
Ташкилоти ҷамъиятии мададгори мудофиаи Ҷумҳурии Тоҷикистон имрӯз дорои заминаи мустаҳками моддӣ — техникӣ, анъанаҳои пуршарафи тарбияи ҳарбӣ — ватандӯстӣ буда, ҳамасола барои эҳтиёҷоти Қувваҳои Мусаллаҳи ҷумҳурӣ ҳазорон нафар ҷавонони синни даъватиро соҳибкасб гардонида, барои мудофиаи Ватан сафарбар менамояд.