Тарроҳи беҳтарин дар Конибодом

Хуҷанд, 29.042015. (АМИТ Ховар, Абдуаҳад Шарифзода).-Бахшида ба эълони Соли 2015 соли оила ва дар санаи 15 май таҷлили рӯзи байналмиллалии оила бо ибтикори мақомоти шаҳрӣ, шуъбаи фарҳанг ва соҳибкорон-дӯзандагонӣ маҳаллӣ дар шаҳри Конибодоми вилояти Суғд бо мақсади тарғибу ташвиқи оиладорӣ ва фарҳанги миллӣ, аз ҷумла либоспӯшӣ ва ҳамчунин ба касбомӯзӣ ҷалб намудани занону духтарони маҳаллӣ озмуни Тарроҳи беҳтарин баргузор хоҳад шуд.Тавре ки аз маркази матбуоти мақомоти шаҳри Конибодом иттилоъ доданд, дар доираи баргузории чорабинии мазкур, дирӯз дар коллеҷи омӯзгории шаҳр чунин озмун доир гашт, ки дар он маҳсули ҳунари дӯзандагии ду нафар тарроҳи ҷавон, яъне муҳассилини коллеҷи номбурда Фарзона Мирзоева ва Фарангис Исоева пешкаши ҳозирин гардонида шуд. Дар озмун аз ҷониби як иштирокчӣ 8 намуд ва аз дигарӣ 12 намуд либоси милливу аврупоии дӯхтаи онон ба намоиши ҳакамон ва тамошобинон гузошта шуд. Бояд гуфт, ки даври аввали озмуни «Тарроҳи беҳтарин» алъон дар муассисаҳои таълимӣ ва коллеҷҳои шаҳр оғоз гардида, он моҳи май дар арафаи ҷашнгирии рӯзи оила ҷамъбаст мегардад.