Таваҷҷуҳ ба забони русӣ меафзояд

Душанбе, 30.04.2015.(АМИТ Ховар, Рафоати Абдулҳамид).- Шурӯъ аз моҳи сентябри соли равон дар тамоми муассисаҳои таҳсилоти умумии ҷумҳурӣ ба хонандагон як соат бештар аз фанни забони русӣ дарс дода мешавад.Тавре ки Вазорати маорифи Ҷумҳурии Тоҷикистон хабар додааст, соли 2004 Барномаи давлатии такмил ва омӯзиши забонҳои русӣ ва англисӣ дар Тоҷикистон барои солҳои 2004- 2014 таҳия ва қабул гардид.Тавассути ин барнома бештар бо Вазорати маориф ва илми Русия ҳамкорӣ кардем. Бо ибтикори сафорати Русия дар Тоҷикистон дар Донишгоҳи славянии ҷумҳурӣ давраҳои семоҳаи бозомӯзии омӯзгорони фанни забони русӣ ташкил гардид. Китобҳои методию дарсӣ омода шуда, ба тамоми муассисаҳои таълимӣ дастрас гардиданд. Ин барнома даҳ сол амал кард ва марҳалаи аввали он соли 2014 ба поён расид, ки на ҳамаи бандҳои барномаи қаблӣ пурра иҷро шуданд. Бо қарори Ҳукумати Ҷумҳурии Тоҷикистон Барномаи давлатии такмили таълим ва омӯзиши забони русӣ ва англисӣ дар Ҷумҳурии Тоҷикистон тасдиқ гардид. Тибқи ин барнома барои хонандагони синфҳои болоӣ, ки қаблан аз фанни забони русӣ 3 соат дарс мегирифтанд, акнун як соати дигар илова шуд.