Як рўзи ҷумҳуриявии тамошои осорхона

Душанбе, 03.04.2015 (АМИТ «Ховар», Фарзонаи Давлат).-5 апрели соли равон дар кишвар рўзи дарҳои кушоди осорхонаҳо зери унвони «Як рўзи ҷумҳуриявии тамошои осорхона» доир мегардад, ки сокинон метавонанд аз осорхонаҳо ройгон дидан намоянд. 
Ин иқдом аз ҷониби Кумитаи ҷавонон, варзиш ва сайёҳӣ ва Вазорати фарҳанги кишвар ба роҳ монда шуда, мақсад аз баргузории чорабинӣ рушди туризми дохилӣ ва ҷалби таваҷҷуҳи ҷомеа ба мероси фарҳангии кишвар, инчунин ҷиҳати саҳмгузорӣ ба хотири ғанӣ гардонидани маънавиёти ҷавонону наврасон арзёбӣ мегардад. 
Бино ба иттилои Наврӯз Қурбонов, мутхассиси пешбари Бахши таҳлилу иттилооти Кумитаи ҷавонон, варзиш ва сайёҳӣ, бо таваҷҷуҳ ба иқтидор, хусусиятҳои табиӣ ва таърихию фарҳангӣ дар қатори дигар самтҳо соҳаи сайёҳӣ- туризми таърихиву фарҳангӣ ва этнографӣ  низ дар кишвар ҳамчун самти афзалиятноки иқтисодиёти миллӣ эълон гардидааст.
Дар робита ба ин, дар кишвар «Барномаи рушди туризм дар давраи солҳои 2015-2017», Нақшаи чорабиниҳо оид ба муаррифии имкониятҳои туризми дохилии Тоҷикистон дар соли 2015 қабул гардиданд, ки ҷиҳати татбиқи он чорабиниҳо минбаъд низ роҳандозӣ мегарданд.