Зӯроварии хонаводагӣ ва пешгирии он

 
Душанбе, 10.04.2015.(АМИТ  «Ховар», Лайло Тоирӣ).-  Ҷиҳати  иҷрои Қарори Ҳукумати Ҷумҳурии Тоҷикистон дар бораи «Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2014-2023» Кумитаи кор бо занон ва оилаи назди Ҳукумати ҶТ,  бо мақсади пеш бурдани корҳои тарғиботию ташвиқотӣ ва роҳ надодан ба зӯроварию табъиз дар муносибатҳои оилавӣ дар якҷоягӣ бо Лоиҳаи «Пешгирии зӯроварии хонаводагӣ» дар кумита дар мавзӯи «Зӯроварии хонаводагӣ: кор дар самти ҳолатҳои дучоршавии занон бо зӯроварӣ дар хона» бо иштироки коршиноси байналхалқӣ, мутахассиси соҳаи гендер аз Ҷумҳурии Молдова семинар баргузор гардида, он 8 апрели соли равон корашро ҷамъбаст намуд.
Бино ба иттилои хадамоти матбуоти кумита, рӯзҳои 6 ва 7 апрел семинар барои рӯзноманигорон ва намояндагони табақаҳои гуногуни аҳолӣ ва рӯзи 8 барои мудирони шуъбаву бахшҳои кор бо занон ва оилаи мақомоти маҳаллии ҳокимияти давлатии шаҳру ноҳияҳо, раисони маҳаллаҳо ва фаъолони маҳалҳо гузаронда шуд.
Иштирокдорон аз чунин як семинари муфид изҳори қаноатмандӣ намуда, арз доштанд, ки малакаву донишҳои андӯхтаро дар баррасии масъалаи мазкур дар маҳали зист ба роҳ мемонанд.