Зарурати омўзиши математика дар мактабҳои олӣ

Душанбе, 13.04.2015. (АМИТ «Ховар», Раъно Нусратуллозода).-Бо ташаббуси кафедраи математикаи олӣ бо иштироки доираи васеи устодон ва донишҷӯёни Донишкадаи молия ва иқтисоди Тоҷикистон (ДМИТ) 11 апрел дар мавзӯи «Омўзиши математика ва тайёрии иқтисодии донишҷўёни мактабҳои олӣ» мизи мудаввар доир гардид.
Тавре ки аз ДМИТ иттилоъ доданд, ноиби ректор оид ба илм Ғиёсиддин Ашуров гуфт, ки омӯзиши матеметика барои толибилмони риштаи иқтисодӣ хеле зарур аст. Ҳамид Маҷидов, профессори кафедраи математикаи олӣ ва фанҳои табиатшиносии Донишгохи давлатии тиҷорати Тоҷикистон дар мавзӯи «Тарбияи иқтисодии донишҷӯён дар шароити низоми кредитии таҳсилот», Нурулло Усмонов, профессори ДМИТ дар мавзӯи «Масъалаи ёфтани капитал аз рўи инвеститсияи тоза (маблағгузорӣ)» ва Бобоалӣ Шарипов дотсенти Донишкадаи соҳибкорӣ ва хизмат дар мавзӯи «Татбиқи муодилаи дифференсиалӣ дар ҳалли як масъалаи иқтисодӣ» маърўза намуданд. 
Зикр шуд, ки бо сабаби ба низоми кредитӣ гузаштани муассисаҳои таҳсилоти олии касбии кишвар устодон ва роҳбарони ин муассисаҳоро зарур аст, ки меъёрҳои дар сатҳи байналмилалӣ эътирофшударо пурра татбиқ намуда, доир ба масъалаи омўзиши технологияҳои инноватсионӣ, ворид намудани таҷҳизоти ҳозиразамон ва ба ин восита самаранок гардонидани сифати таълим тадбирҳои ҷиддӣ андешанд.