Ғалабаи Хуҷанд бар Хайр

Душанбе, 25.05.2015. (АМИТ «Ховар», Меҳрони Қурбон).-Дастаи «Хуҷанд»-и Хуҷанд дар даври ҳафтуми сабқати лигаи олии футболи Тоҷикистон дар майдони худ дастаи «Хайр»-и Ваҳдатро бо ҳисоби бузурги 3-0 шикаст дод. Голҳоро Бахтиёр Чориев дар нимаи аввали бозӣ, Иброҳим Рабимов ва Фарҳод Тоҳиров дар нимаи дувуми бозӣ заданд. Баъди ин ғалаба дастаи Хуҷанд дар ҷадвали мусобиқа ба ҷойи дувум баромад.Хотиррасон менамоем, ки дастаи «Парвоз»-и Бобоҷон Ғафуров дар майдони худ аз дастаи «Далерон-Ӯротеппа»-и Истаравшан бо ҳисоби 0-1 шикаст хӯрд. Тӯбро Шероз Абдуллоев, бозингари дастаи Парвоз ба дарвозаи дастааш задааст. Дарвоқеъ, дастаи Парвоз ягона дастаест, ки ҳамаи 7 бозии имсоларо бохтааст ва то ҳоло ягон гол назадааст. Дастаи истаравшаниҳо баъди ин пирӯзӣ дар ҷадвал як зина боло шуд, ҷойи 6-умро касб намуданд.Ёдовар мешавем, ки бозӣ байни дастаҳои Вахш-и Қӯрғонтеппа Барқи тоҷик-и Душанбе бо ҳисоби 0-0 хотима ёфт. Мавқеи ҳарду даста дар ҷадвали мусобиқа тағйир наёфт.Ба иттилои Лигаи миллии футболи Тоҷикистон бозии даври ҳафтум байни дастаҳои «Истиқлол»-и Душанбе «Регар-ТадАЗ»-и Турсунзода бинобар омодагии қаҳрамони Тоҷикистон ба бозии даври ҳаштякниҳоии Ҷоми AFC бо тими Ал-Ваҳда-и Сурия (26 май дар Душанбе), аз 24 май ба рӯзи ҷумъаи 29 май гузаронида шудааст.